Yuk mashinalari importiga imtiyozlar uzaytirildi

"Yevro-5" va undan yuqori ekologik standartlarga mos keladigan yuk avtomobillari 2021-yil avgustidan 2025-yil 1-yanvargacha bojxona to‘lovlari va utilizatsiya yig‘imidan ozod etilgan edi. Prezident ushbu imtiyozni yana uch yilga, 2028-yilgacha uzaytirishni ma’qulladi.

Bu haqda 7-fevral kuni prezident raisligida o‘tgan yig‘ilishda ma’lum qilindi. Shuningdek, u Samarqand, Buxoro, Urganch, Nukus va Termizga aviaqatnovlar sonini ikki baravar oshirishni topshirdi.

O‘tgan yilda O‘zbekistonda transport xizmatlari hajmi — 8,6% ga oshib, 145 trln so‘mga yetdi. Biroq, prezident yuqori iqtisodiy o‘sishni ta’minlash uchun bu yetarli emasligini ta’kidladi.

Xalqaro tashuvlarda mahalliy ekspeditorlarning ulushini oshirish maqsadida ular QQS (qo‘shilgan qiymat solig‘i) to‘lashdan ozod qilindi. Shunday qilib, Transport vazirligi 2025-yilda ularning ulushini 25% gacha, 2026-yilgacha esa 50% gacha oshirishni ta’minlashi lozim.