Endilikda jarimalar pochta orqali yuborilmaydi

2026 yil 1 martdan boshlab yo‘l harakati qoidalarini buzganlik uchun jarimalar haqida qog‘oz shaklidagi xabarnomalar pochta orqali yuborilmaydi. Bu haqda O‘zbekiston Pochtasi rasmiy resurslarida ma’lum qilindi.

Ma’lum qilinishicha, IIV huzuridagi “Xavfsiz shahar” markazi 2026 yil uchun jarimalarni yetkazib berish bo‘yicha shartnomani uzaytirmagan. Natijada, “baxt maktublari”ni yetkazish amaliyoti to‘xtatiladi.

Shu bilan birga, qog‘oz xabarnoma kelmasligi jarimaning bekor qilinganini anglatmaydi. Haydovchilar to‘lov muddatini o‘tkazib yubormasliklari va chegirmadan foydalanish imkoniyatini yo‘qotmasliklari uchun jarimalarni mustaqil ravishda tekshirib borishlari tavsiya etiladi.

Jarimani quyidagi platformalar orqali tekshirish mumkin:

• my.gov.uz ilovasi
• Road24 ilovasi
• Safe Road ilovasi (rasmiy, biroq ayrim hollarda uzilishlar kuzatiladi)
• Payme, Click va bank ilovalari
• SMS xabarnoma orqali

Jarimani to‘lash muddati

Agar jarima YPX inspektori tomonidan haydovchi ishtirokida rasmiylashtirilgan bo‘lsa, uni 30 kun ichida to‘lash kerak.

Agar jarima avtomatik kamera tizimi orqali rasmiylashtirilgan bo‘lsa, to‘lov muddati 60 kunni tashkil etadi.

Shuningdek, jarimani tezroq to‘lagan haydovchilar uchun chegirmalar amal qiladi:

• Qaror chiqarilgan kundan boshlab 15 kun ichida to‘lansa — 50% chegirma.
• 16–30 kun oralig‘ida to‘lansa — 30% chegirma.

Chegirma qaror chiqarilgan sanadan boshlab hisoblanadi, qoidabuzarlik sodir etilgan kundan emas.

Jarima qancha vaqtda rasmiylashtiriladi?

Jarimani rasmiylashtirish uchun umumiy muddat 17 kunni tashkil etadi:

• 48 soat — kamera yoki radar ma’lumotlarini YPXga yetkazish uchun;
• 15 kun — jarima to‘g‘risida qaror chiqarish uchun.

Agar ushbu muddat ichida qaror chiqarilmasa, haydovchi ma’muriy javobgarlikka tortilmaydi.

Qaror chiqarilgach, avtomobil egasini xabardor qilish uchun 3 kun ajratiladi. Xabarnoma SMS, ilovalar yoki boshqa elektron vositalar orqali yuboriladi.

Shunday qilib, umumiy hisobda jarima 20 kun ichida yetib kelishi kerak. Eslatib o‘tamiz, 2025 yil 29 yanvardan boshlab Ma’muriy javobgarlik to‘g‘risidagi kodeksga tegishli o‘zgartirishlar kuchga kirgan.