O‘zbekistonda taksilarga yangi imtiyozlar berildi

O‘zbekistonda yuridik shaxslarga tegishli taksilarga "To‘xtash taqiqlangan" belgilari amal qiladigan joylarda yo‘lovchilarni tushirish va olishga ruxsat berildi. Bu esa aeroportlar, temir yo‘l vokzallari va boshqa muhim obyektlar yaqinida yo‘lovchilarga qulaylik yaratadi.

Bundan tashqari, quyidagi imtiyozlar ham taqdim etildi:

• bepul avtoturargoh: aeroportlar, temir yo‘l vokzallari, bozorlar va davlat ulushi 50% dan ortiq bo‘lgan savdo markazlaridagi pullik avtoturargohlarga bepul kirish huquqi berildi;

• ajratilgan yo‘laklardan harakatlanish: endi yuridik shaxslarga tegishli taksilar avtobuslar uchun maxsus ajratilgan yo‘laklar bo‘ylab harakatlanishi mumkin.

Bu qaror taksi xizmatlarini rivojlantirish va yo‘lovchilar uchun yanada qulay shart-sharoit yaratishga qaratilgan.