Chevrolet Cobalt Qozog‘iston bozorining yetakchisiga aylandi

2025-yilning iyul oyida qo‘shni Qozog‘istonda 20 165 dona yangi yengil va tijorat avtomobillari sotildi. Bu o‘tgan yilning shu davriga nisbatan 10,6% ko‘p degani. Bu haqda “Qozog‘iston avtomobil ittifoqi” (KAO) ma’lum qildi.

Yil boshidan iyul oyigacha bo‘lgan davrda esa jami 125 034 ta yangi avtomobil xarid qilingan — bu esa 2024-yilning shu davriga qaraganda 23,4% ko‘proq.

Chevrolet – bozor yetakchisi

Iyul oyida eng ko‘p mashina sotgan brend Chevrolet bo‘ldi — 4048 dona avtomobil. Bu o‘tgan yilning iyuliga nisbatan 70,4% o‘sish demakdir. Avvalgi yetakchi Hyundai esa ikkinchi o‘ringa tushdi: bir yilda savdo hajmi 14,4% kamayib, 3713 dona avtomobil sotildi. Uchinchilikni esa Kia egalladi — 2170 dona (+11,9%). Shuningdek, Jetour (1321 dona, +26,7%) va Chery (1138 dona, −17%) ham yuqori o‘rinlarda qayd etildi.

Model reytingida kim oldinda?

Model kesimida Chevrolet Cobalt mutlaq yetakchi — iyul oyida 3417 dona sotilgan. Ikkinchi o‘rinda Hyundai Tucson (1211 dona), uchinchi o‘rinda esa Kia Sportage (955 dona) joylashdi.

Top-10 ichida uchta Xitoy modeli bor:

• JAC JS3 — 6-o‘rin (605 dona)
• Haval M6 — 7-o‘rin (528 dona)
• Chery Tiggo 2 — 10-o‘rin (397 dona)

Qozog‘iston avtomobil bozoridagi bunday o‘zgarishlar Chevrolet’ning mintaqadagi pozitsiyasini mustahkamlashini ko‘rsatmoqda. Mutaxassislar fikricha, byudjet segmentida ham, SUV segmentida ham talab barqaror yuqori bo‘lib qolmoqda.