O‘zbekistonda ilk bor Turon Enduro Uzbekistan Cup 2025 musobaqasi bo‘lib o‘tdi

2025-yil 9–10-avgust kunlari O‘zbekiston tarixida ilk bor Turon Enduro Uzbekistan Cup 2025 enduro poygalari tashkil etildi.

Musobaqada O‘zbekistonning turli hududlaridan va Osiyo mintaqasidagi mamlakatlardan kelgan jami 30 nafar professional rayder ishtirok etdi. Turnir yuqori darajadagi tashkiliy ishlar va murakkab trassalari bilan xalqaro standartlarga mos darajada o‘tdi. Musobaqaning birinchi kuni Super Enduro formatidagi mashg‘ulot va saralash bosqichlari bilan boshlandi. Natijada kuchli 10 nafar sportchi finalga yo‘l oldi.

Ikkinchi kun — Rock Day — Akkermann karerida bo‘lib o‘tdi. Rayderlar tik ko‘tarilishlar, xavfli tushishlar, toshloq yo‘llar va sun’iy to‘siqlar kabi murakkab sinovlarni yengib o‘tishdi. Ushbu bosqich qatnashchilardan tezlik bilan birga chidamlilik, texnik mahorat va yuqori darajadagi e’tibor talab qildi.

Musobaqa yakunlariga ko‘ra, g‘oliblar quyidagicha bo‘ldi:

Sergey Terentyev — 1-o‘rin;

Yan Blimxin — 2-o‘rin;

Anton Kulik — 3-o‘rin.

Mutasaddilar bu musobaqa O‘zbekistonda enduro sportini rivojlantirishdagi muhim qadam ekanini ta’kidlashdi. Rejaga ko‘ra, Turon Enduro Uzbekistan Cup har yili o‘tkaziladigan va mamlakat ichkarisida ham, xalqaro miqyosda ham keng auditoriyani jalb qiladigan an’anaviy sport tadbiriga aylanishi kutilmoqda.