O‘zbekistonda AI-80 benzinni sotish taqiqlandi

O‘zbekistonda 1-dekabrdan AI-80 benziniga to‘liq taqiq joriy etiladi.

Mas’ul idoralarga avtomobillarga yoqilg‘i quyish shoxobchalarida AI-80 benzinining sotilishiga yo‘l qo‘ymaslik, aholini sifatli va ekologik toza yoqilg‘i bilan ta’minlash bo‘yicha qat’iy nazorat o‘rnatish topshirildi.

Bunday chora-tadbirlar prezidentning 2025-yil 18-noyabrdagi PQ-343-son qarorida nazarda tutilgan bo‘lib, Toshkent shahridagi ekologik vaziyatni yaxshilashga qaratilgan.

Aslida AI-80 savdosi 2-sentabrdan boshlab deyarli to‘xtagan edi — o‘sha kuni “O‘zbekneftgaz” bu yoqilg‘ini birja savdolaridan chiqarib tashlagan. Shunga qaramay, ayrim YQSHlar mavjud zaxiralarni sotishda davom etgan bo‘lishi mumkin.

Endilikda AI-80ning chakana savdosi to‘liq taqiqlanadi. Asosiy sabab — uning yuqori darajadagi zararli chiqindilaridir: oktan soni past bo‘lgan eskirgan benzin dvigatel ishlaganda zamonaviy yoqilg‘ilarga nisbatan ancha ko‘p toksik moddalar ajratadi.