Chevrolet Cobalt sotuvlari bir yilda deyarli 30 foizga tushib ketdi

O‘zbekistonda Chevrolet Cobalt savdosi ketma-ket bir necha oy davomida pasaymoqda. 2026 yilning yanvar-aprel oylarida modeldan jami 29 923 dona sotilgan. O‘tgan yilning shu davrida esa ko‘rsatkich 42 504 donani tashkil qilgan edi.

Shunday qilib, bir yil ichida Cobalt savdosi 12 581 taga yoki qariyb 30 foizga kamaydi. Pasayish ayniqsa aprel oyida keskinlashgan: bir oy ichida atigi 5 930 dona avtomobil sotilgan. Avval esa Cobalt odatda oyiga 8 mingtagacha sotilar edi.

Birinchi chorak natijalari ham salbiy dinamikani ko‘rsatmoqda. 2025 yil yanvar-mart oylarida 29 017 dona Cobalt sotilgan bo‘lsa, bu yil shu davrda ko‘rsatkich 23 993 donagacha tushib ketdi. Bu esa 17,3 foizlik pasayishni anglatadi.

Mutaxassislar fikricha, aprel oyidagi keskin farq qisman o‘tgan yilgi yuqori baza bilan bog‘liq. Chunki 2025 yil aprelida UzAuto Motors dekabr oyida tuzilgan shartnomalar bo‘yicha avtomobillarni faol topshirgan edi. Biroq birinchi chorakdagi minus 17 foizlik dinamika muammo faqat statistik effekt emasligini ko‘rsatmoqda.

Bozorning o‘zi ham o‘zgardi. Bir necha yil avval Cobalt katta defitsit bilan sotilgan bo‘lsa, hozir avtomobil Toshkent avtosalonlarida erkin mavjud. 28 aprel kuni UzAuto Motors onlayn kontraktatsiyani ochganiga qaramay, avvalgidek shov-shuv kuzatilmadi. Hozir Cobalt’ni navbatsiz, bir kun ichida olib ketish mumkin.

Avvalgi yillarda defitsit tufayli ko‘plab avtomobillar oddiy xaridorlarga emas, balki перекупщикларга ketgan edi. Cobalt erkin sotila boshlagach, qayta sotuvchilar bozordan chiqib ketdi va bu ham statistikaga ta’sir qildi.

Biroq pasayishni faqat shu bilan tushuntirib bo‘lmaydi. So‘nggi bir yil ichida O‘zbekiston bozorida BYD Yuan Up, Kia K3 va boshqa yangi modellarning paydo bo‘lishi xaridor tanlovini sezilarli kengaytirdi.

Agar ilgari ko‘pchilik Cobalt va Gentra orasidan tanlagan bo‘lsa, endi xaridorlar Onix, Tracker, elektromobillar, gibridlar yoki Jizzaxda ishlab chiqarilayotgan koreys sedanlariga ham e’tibor qaratmoqda.

Qiziq tomoni, xaridorlarning bir qismi Chevrolet ichida boshqa modelga o‘tmoqda. Masalan, 2026 yil yanvar-aprel oylarida Chevrolet Onix’dan 13 866 dona sotilgan. O‘tgan yil shu davrda esa bu ko‘rsatkich atigi 5 671 dona edi. O‘sish — 144,5 foiz.

Ammo Cobalt va Onix ko‘rsatkichlarini qo‘shib hisoblaganda ham segment umumiy pasayishni ko‘rsatmoqda. O‘tgan yili ikki model birgalikda 48 175 dona sotilgan bo‘lsa, bu yil ko‘rsatkich 43 789 donagacha tushgan. Ya’ni minus 9 foiz.

Shunga qaramay, Chevrolet Cobalt hanuz O‘zbekistonning eng ko‘p sotilayotgan yengil avtomobili bo‘lib qolmoqda. To‘rt oy ichida sotilgan 29 923 dona avtomobil — BYD, Kia, Haval va Chery’ning umumiy natijasidan ham yuqori. Ammo bir narsa aniq: Cobalt bozordagi avvalgi mutlaq hukmron model bo‘lib qolmayapti.