Elektromobil egalarida ko‘p uchraydigan top besh xatoliklar

So‘nggi yillarda dunyoda, xususan, Rossiya va Markaziy Osiyoda elektromobillarga bo‘lgan qiziqish ortib bormoqda. Atrof-muhitga ta’sirining kamligi, yonilg‘i xarajatlarining kamayishi va texnologik rivojlanish elektromobillarni tobora ommalashtirmoqda. 

Biroq, benzinli mashinadan elektromobilga o‘tayotgan haydovchilar ko‘pincha bir nechta keng tarqalgan xatolarga yo‘l qo‘yadilar:

1. Noto‘g‘ri avtomobil tanlash — elektromobil tanlashda asosiy e’tibor yuriladigan masofaga va foydalanish sharoitlariga qaratilishi kerak. Agar siz haftaning ko‘p kunlarini shahar ichida o‘tkazsangiz, faqat elektrda harakatlanuvchi model sizga mos keladi. Ammo tez-tez shaharlararo yoki uzoq masofalarga safar qiladigan bo‘lsangiz, gibrid avtomobil yaxshiroq variant hisoblanadi. Unutmang, katta krossoverlar kichik sedanlarga nisbatan ko‘proq energiya sarflaydi va bitta zaryad bilan kamroq masofani bosib o‘tadi.

2. Zaryadlash nuqtalarini oldindan rejalashtirmaslik — elektromobil egalari uchun asosiy qulayliklardan biri — uni o‘z vaqtida va oson zaryad qila olish imkoniyatidir. Ideal holat — avtomobilni tunda uy yoki ishxonadagi oddiy rozetkaga ulab qo‘yish. Shunda zaryad sekin, ammo arzon va qulay tarzda to‘planadi. Agar siz tez zaryadlovchi stansiyalarni afzal ko‘rsangiz, jadvalingizda unga alohida vaqt ajratishingiz kerak bo‘ladi. Bundan tashqari, avtomobilingizdagi zaryad porti (CCS yoki GBT) stansiya bilan mos keladimi-yo‘qmi — buni ham inobatga olish kerak. Aks holda, qimmat adapterlar talab qilinadi va ulardan foydalanish har doim ham ishonchli emas.

3. Elektromobilni noto‘g‘ri buksir qilish — ko‘pchilik DVSli mashina egalari kabi elektromobilni ham oddiy buksir orqali tortib ketish mumkin deb o‘ylaydi. Ammo elektromobillarning g‘ildiraklari to‘g‘ridan-to‘g‘ri elektr motor bilan ulangan. Buksir paytida motor avtomatik ravishda generator sifatida ishlay boshlaydi va bu elektron tizimlarni ishdan chiqarishi mumkin. Shuning uchun bunday holatda faqat evakuatordan foydalanish tavsiya etiladi.

4. Qayta yig‘ilgan (restavratsiyalangan) batareyalardan foydalanish — bozorda ko‘plab eski elektromobillar arzon narxda taklif etiladi. Bu mashinalar ko‘pincha yaroqsiz holga kelgan batareyalar bilan sotiladi. Ba’zi ustaxonalar batareyani yangi hujayralar bilan almashtirib “restavratsiya” qiladi. Ammo bu batareyalarning sifatiga va xavfsizligiga kafolat yo‘q. To‘qnashuv yoki avariya holatida bunday batareyalar jiddiy xavf tug‘dirishi mumkin.

5. Yo‘l marshrutini rejalashtirmaslik — agar siz har kuni bir xil yo‘ldan yuradigan bo‘lsangiz, bu muammo tug‘dirmaydi. Ammo yangi joyga, uzoq safarga chiqqaningizda zaryadlash stansiyalarining joylashuvini oldindan bilib olish zarur. Bugungi kunda maxsus mobil ilovalar orqali zaryadlash nuqtalarini oldindan ko‘rish, bepul to‘xtash joylarini belgilash va servislar joylashuvini aniqlash mumkin. Bu sizni yo‘lda zaryadsiz qolishdan saqlaydi.

Elektromobil — kelajak transporti hisoblanadi, ammo undan to‘g‘ri foydalanishni o‘rganish lozim. To‘g‘ri tanlov, yaxshi rejalashtirish va texnik qoidalarga amal qilish sizni noqulay holatlardan himoya qiladi hamda elektromobil tajribangizni yanada yoqimli qiladi.