Toshkentda Shota Rustaveli ko‘chasida markaziy avtobus yo‘lagi ishga tushmoqda

7-oktabrdan boshlab Toshkent shahrining Shota Rustaveli ko‘chasida markaziy avtobus yo‘lagida harakat boshlanadi. Dastlabki bosqichda yangi tizim bo‘yicha 38-, 57- va 58-sonli avtobus yo‘nalishlari qatnaydi, deb xabar berdi shahar transport boshqarmasi matbuot xizmati.

Bu tizimning joriy etilishi yo‘lovchilar xavfsizligini oshirish va avtobuslarning tezkor harakatini ta’minlashga qaratilgan. Quyida ushbu yo‘lakdan foydalanish bo‘yicha qisqacha ko‘rsatmalar keltirilgan.

Yo‘lovchilar uchun:

• avtobuslar endilikda markaziy, maxsus ajratilgan yo‘lak bo‘ylab harakatlanadi;
• yo‘lovchilar chiqish va tushish jarayonini yo‘l o‘rtasidagi maxsus platformalarda amalga oshiradi;
• platformalarga faqat belgilanggan piyodalar o‘tish joylari orqali o‘tish mumkin; boshqa joylardan o‘tish qat’iyan taqiqlanadi;
• yo‘lovchilar avtobusni faqat old tomonidan aylanib o‘tishlari kerak;
• platformada xavfsizlik sariq chizig‘i orqasida turish lozim, eshik oldiga faqat avtobus to‘liq to‘xtagandan so‘ng yaqinlashish mumkin;
• keksalar, bolali yo‘lovchilar va nogironligi bo‘lgan fuqarolarga joy berish tavsiya etiladi;
• telefon yoki fotoapparatdan foydalanishda atrofga e’tiborli bo‘lish kerak.

Haydovchilar uchun:

• markaziy yo‘lak faqat avtobuslar harakati uchun mo‘ljallangan;
• ushbu yo‘lakda boshqa transport vositalarining harakati, to‘xtashi yoki kesib o‘tishi qat’iyan man etiladi;
• avtobuslarga ustunlik beriladi — ruxsat etilgan joylarda ularga yo‘l berish majburiy;
• ikkala yo‘nalishda ham chapga burilish va orqaga qaytish taqiqlangan;
• burilishlar faqat maxsus belgilangan chorrahalarda amalga oshiriladi.

Yangi tizim yo‘l infratuzilmasini tartibga solishga, avtobuslarning jadval asosida harakatlanishiga va umumiy transport tizimining samaradorligini oshirishga xizmat qiladi.