Chorbog’ yo‘nalishidagi yo‘lda tezlik cheklanadi

Toshkent viloyati xalq deputatlari kengashi Charvak yo‘nalishidagi avtomobil yo‘lida harakat tezligini kamaytirish to‘g‘risida qaror qabul qildi. Cheklov Gazalkent chorrahasidan Xo‘jikentgacha bo‘lgan yo‘l qismiga tatbiq etiladi.

2026 yil 2 fevraldagi hujjatga ko‘ra, trassaning 19-kilometridan 74-kilometrigacha bo‘lgan oraliqda ruxsat etilgan maksimal tezlik 80 km/soat etib belgilandi. Ushbu cheklov aholi punktlaridan tashqarida joylashgan olti uchastkada joriy etiladi.

Toshkent viloyati avtomobil yo‘llari bosh boshqarmasiga 10 kun ichida 3.24 — “Maksimal tezlikni cheklash” yo‘l belgilarini o‘rnatish topshirildi.

Qaror 2025 yil 23 iyundagi Prezidentning 98-sonli farmoni asosida qabul qilingan bo‘lib, ushbu hujjat mahalliy kengashlarga ayrim yo‘l uchastkalarida tezlik rejimini belgilash vakolatini bergan.

Rasmiy ma’lumotlarga ko‘ra, cheklovning asosiy sababi — yuqori avariyaviylik. 2025 yil davomida ushbu yo‘lda 63 ta YTH sodir bo‘lgan, natijada 15 kishi halok bo‘lgan, 50 kishi jarohat olgan.