Yo‘l harakati qoidalarini buzganlik uchun jarima ballari

O‘zbekistonda yo‘l harakati qoidalarini buzganlik uchun jarima ballari belgilandi

Shuningdek, har bir qoidabuzarlik uchun qancha ball berilishi ham aniqlandi.

Quyida ma’muriy javobgarlik to‘g‘risidagi Kodeks moddalari bo‘yicha jarima ballari ro‘yxati keltirilgan:

- 125-moddaning 3-qismi (tormoz tizimi, rul boshqaruvi yoki tirkama moslamasida nosozlik bo‘lgan yoki ruxsatsiz qayta jihozlangan transport vositalarini boshqarish) — 0,5 ball;

- 125-moddaning 5-qismi (ekspluatatsiyasi taqiqlangan yoki davlat raqam belgisi o‘zboshimchalik bilan olib tashlangan transport vositalarini boshqarish) — 1 ball;

- 126-modda (oyna qoplamasi yoki oynalarining qoraytirilishi, shuningdek, ko‘rinishni cheklovchi qoplamalar bilan transport vositasidan foydalanish) — 0,5 ball, qayta qoidabuzarlikda — 1 ball;

- 127-moddaning 1-qismi (behojat signal berish, ishlab chiqaruvchi tomonidan nazarda tutilmagan tovush va yorug‘lik moslamalarini o‘rnatish yoki qayta jihozlash) — 0,5 ball;

- 128-3-moddaning 1-qismi (belgilangan tezlik me’yoridan 20 km/soatgacha oshirib yuborish) — 0,5 ball;

- 128-3-moddaning 2-qismi (tezlikni 20 km/soatdan 40 km/soatgacha oshirib yuborish) — 1 ball;

- 128-3-moddaning 3-qismi (tezlikni 40 km/soatdan 60 km/soatgacha oshirib yuborish) — 1,5 ball;

- 128-3-moddaning 4-qismi (tezlikni 60 km/soatdan ko‘proq oshirib yuborish) — 2 ball;

- 128-4-moddaning 2-qismi (svetoforning taqiqlovchi signali yoki yo‘l harakatini tartibga soluvchi xodimning taqiqlovchi ishorasida harakatlanish) — 1 ball;

- 128-5-moddaning 1-qismi (maxsus yoritgich va ovoz signali yoqilgan operativ va maxsus transport vositalarining harakatlanishiga to‘sqinlik qilish) — 0,5 ball;

- 128-5-moddaning 2-qismi (qarama-qarshi harakatlanish uchun mo‘ljallangan yo‘l bo‘lagiga chiqish yoki avariyaviy holat yaratish) — 2 ball;

- 128-6-modda (to‘xtash va turish qoidalarini buzish) — 0,3 ball;

- 128-8-moddaning 1-qismi (odam tashish qoidalarini buzish) — 0,5 ball;

- 128-8-moddaning 2-qismi (ichki ishlar organlari hamrohligisiz odamlarni avtobus va mikroavtobuslarda tashish, agar bunday hamrohlik majburiy bo‘lsa) — 0,5 ball;

- 128-9-modda (transport vositalarini quvib o‘tish qoidalarini buzish) — 1,5 ball;

- 129-modda (yo‘l harakati xavfsizligiga tahdid soluvchi yoki avariyaviy holatga olib keluvchi guruhli haydovchilikda qatnashish) — 2 ball;

- 130-modda (temiryo‘l kesishmasidan o‘tish qoidalarini buzish) — 1 ball;

- 137-moddaning 1-qismi (yo‘l-transport hodisasi joyini qoldirib ketish) — 2 ball.

Jarima ballari avtomatik tarzda E-jarimaball moduli orqali qayd etiladi. Tizim bosqichma-bosqich joriy etilib, dastlab faqat YPX xodimlari tomonidan qayd etilgan qoidabuzarliklarga tatbiq etiladi. Kelajakda esa haydovchining shaxsini aniqlash tizimi joriy etilgach, foto va video qayd etish vositalari orqali aniqlangan qoidabuzarliklarga ham qo‘llaniladi.

Jarima ballari birinchi qoidabuzarlik sodir etilgan kundan boshlab bir yil davomida hisoblanadi. Agar shu muddat ichida haydovchi 12 ballga yetib bormasa, ular avtomatik tarzda bekor qilinadi va hisob-kitob qaytadan boshlanadi. Agar haydovchi 12 oy davomida qoidabuzarlik qilmasa, keyingi qoidabuzarlik uchun unga jarima balli hisoblanmaydi.

Agar oxirgi qoidabuzarlikdan keyin 6 oy ichida yangi qoidabuzarlik sodir etilmasa, haydovchining umumiy jarima ballaridan 2 ball olib tashlanadi.

Agar hisobda 2 balldan kam ball qolgan bo‘lsa, barcha ballar bekor qilinadi va jarima ballari qayta hisoblash muddati yangi qoidabuzarlikdan boshlab boshlanadi.