Haydovchi tayyorlashdagi tartibni buzish jinoyatga tenglashtiriladi

O‘zbekistonda haydovchilarni tayyorlash va qayta tayyorlash, imtihon o‘tkazish hamda haydovchilik guvohnomalarini berish tartibini buzganlik uchun jinoyat javobgarligi joriy etilishi rejalashtirilmoqda. Bu 24-yanvar kuni Oliy Majlis Senati majlisida ma’qullangan qonunda nazarda tutilgan. Hujjat imzolash uchun prezidentga yuborildi.

Jinoyat kodeksiga yangi 228−2-modda (avtomototransport vositalari va shahar elektr transporti haydovchilarini, shuningdek, traktorchi-mashinistlarni tayyorlash va qayta tayyorlash tartibini, imtihonlar o‘tkazish hamda guvohnomalar berish qoidalarini buzish) kiritiladi.

1-qism:

Mas’ul shaxs tomonidan o‘quv jurnaliga, marshrut varaqasiga yoki imtihon komissiyasi bayonnomasiga o‘quv dasturini o‘zlashtirish yoki imtihonni muvaffaqiyatli topshirish haqida soxta ma’lumot kiritish, shuningdek, ushbu yolg‘on ma’lumotlarga asoslanib haydovchilik guvohnomasi berish.

Jazo:

• 50 dan 100 gacha bazaviy hisoblash miqdorida jarima (18,75 mln – 37,5 mln so‘m),
• ma’lum huquqlardan uch yilgacha mahrum qilish,
• 360 soatgacha majburiy jamoat ishlari,
• yoki uch yilgacha tuzatish ishlari.

2-qism:

Mas’ul shaxs tomonidan nazariy va amaliy imtihon natijalari haqidagi soxta ma’lumotlarni imtihon varaqasiga yoki imtihon natijalari bayonnomasiga kiritish.

Jazo:

• 100 dan 300 gacha BHM jarima (37,5 mln – 112,5 mln so‘m),
• ma’lum huquqlardan besh yilgacha mahrum qilish,
• 360 soatgacha majburiy jamoat ishlari,
• uch yilgacha tuzatish ishlari,
• yoki bir yildan ikki yilgacha erkinlikni cheklash,
• yoki uch yilgacha ozodlikdan mahrum qilish.

3-qism:

1 yoki 2-qismdagi harakatlar:

• takroriy sodir etilgan;
• bir guruh shaxslar tomonidan oldindan kelishilgan holda sodir etilgan;
• og‘ir oqibatlarga olib kelgan;
• xizmat mavqeidan foydalanilgan holda sodir etilgan bo‘lsa.

Jazo:

• 300 dan 600 gacha BHM jarima (112,5 mln – 225 mln so‘m);
• uch yilgacha ma’lum huquqlardan mahrum qilish;
• ikki yildan besh yilgacha erkinlikni cheklash;
• yoki besh yilgacha ozodlikdan mahrum qilish.

Shuningdek, Jinoyat kodeksiga yangi 227−1-modda (davlat raqam belgilari yoki avtomototransport vositalari va ularning tirkamalarining identifikatsiya raqamlarini noqonuniy tayyorlash, topshirish, ishlatish yoki qalbakilashtirish) qo‘shiladi.

1-qism:

Davlat raqam belgilari yoki avtomototransport vositalari va ularning tirkamalarining identifikatsiya raqamlarini noqonuniy tayyorlash, topshirish yoki ishlatish, shuningdek, qalbakilashtirish.

Jazo:

• 50 dan 100 gacha BHM jarima;
• uch yilgacha erkinlikni cheklash;
• yoki uch yilgacha ozodlikdan mahrum qilish.

2-qism:

Xuddi shu harakatlar, agar ular mansabdor shaxs tomonidan sodir etilgan bo‘lsa:

Jazo:

• 100 dan 150 gacha BHM jarima;
• besh yilgacha erkinlikni cheklash;
• yoki besh yilgacha ozodlikdan mahrum qilish.

Takroriy yoki og‘ir jinoyatlar:

• Takroriy sodir etilgan;
• xavfli retsidivist tomonidan sodir etilgan;
• yoki bir guruh shaxslar tomonidan kelishilgan holda sodir etilgan harakatlar.

Jazo:

• uch yildan besh yilgacha erkinlikni cheklash;
• yoki uch yildan besh yilgacha ozodlikdan mahrum qilish.

Eslatib o‘tamiz, Ma’muriy javobgarlik to‘g‘risidagi kodeksning 125-moddasi qalbakilashtirilgan yoki boshqa usulda o‘zgartirilgan davlat raqam belgilari bilan transport vositasini boshqarish uchun 10 BHM miqdorida jarimani nazarda tutadi.