Qurbon hayiti kuni Toshkentdagi barcha masjidlar atrofidagi ko'chalar yopiladi

Qurbon hayiti munosabati bilan 6 iyun kuni Toshkent shahrining 122 ta masjidi atrofida avtomobillar harakati vaqtincha cheklanadi.

Poytaxt IIBB matbuot xizmatiga ko‘ra, harakat cheklovlari 00:00 dan 08:00 gacha amal qiladi — aynan shu vaqt oralig‘ida shahardagi masjidlarda hayit namozlari boshlanadi.

Chora-tadbirlar fuqarolarning xavfsizligini ta’minlash va diniy marosimlarni osoyishta o‘tkazish maqsadida joriy etilmoqda.

Harakat cheklovlari poytaxtning barcha tumanlariga taalluqlidir. Jumladan:

 • Mirzo Ulug‘bek tumani: “To‘ra buva” masjidi atrofida;

 • Olmazor tumani: “Islomobod”, “Hazrati Imom”, “Do‘stjonboy” masjidlari yonida;

 • Shayxontohur tumani: “Shayx Zayniddin”, “Xo‘ja Alambardor”, “Ko‘h Ota” masjidlari yaqinida;

 • Chilonzor: “Novza”, “Ubay ibn Ka’b” va boshqa masjidlar atrofida;

 • Yunusobod: “Minor” va “Mirzo Yusuf” masjidlari atrofida;

 • Shuningdek, Bektemir, Uchtepa, Sergeli, Mirobod, Yashnobod, Yakkasaroy tumanlaridagi masjidlar atrofidagi yo‘llar ham yopiladi.

Bundan tashqari, namozgohlarga olib boruvchi asosiy ko‘chalarda ham harakat cheklanishi mumkin.

Haydovchilardan yo‘nalishlarini oldindan rejalashtirish va iloji boricha aylanma yo‘llardan foydalanish so‘ralmoqda.