Tesla Cybertruckning minglab pikaplari sotilmay qolmoqda

Tesla omborlarida 10 mingdan ortiq sotilmagan Cybertruck elektr pikaplari yig‘ilib qolgan. Mutaxassislar bunga sabab sifatida past talabni ko‘rsatmoqda. 

Har bir mashinaning o‘rtacha narxi — $79 mingni tashkil etadi, umumiy zahiraning qiymati esa — $790 mlnga yetishi mumkin. Ombordagi mashinalarning katta qismi 2024-yilda ishlab chiqarilgan. Ayrimlari bir necha oydan beri sotilmay turibdi, jumladan, oktabrda tugatilgan “Foundation Series” ham.

Tesla yaqinda orqa g‘ildirakdan tortuvchi, ammo funksiyasi soddalashtirilgan yangi versiyasini taqdim etdi — bu talabga moslashish uchun qilinayotgan harakat sifatida baholanmoqda. Analitiklar hozirgi holatda Tesla yiliga atigi 20 mingta Cybertruck sota olishini taxmin qilmoqda, bu esa dastlabki 250 ming donalik rejadan ancha kam.